काळोखाला भेदणारा प्रकाश समोर असतोच...जर त्याच्याकडे पाहायची हिंमत असेल तरच...
जर स्वत: प्रकाश होण्याची हिंमत असेल तरच...
जो बायडेन अमेरिकेच्या राष्ट्राध्यक्षपदी विराजमान होण्याच्या सोहळ्यात आमंडा गॉर्मन या २२ वर्षांच्या कवयित्रीनं The Hill We Climb ही अप्रतिम कविता सादर केली. त्यातल्या या शेवटच्या ओळी...
रॉबर्ट फ्रॉस्ट या कवीनं यापूर्वी जॉन केनेडी यांच्या शपथविधी सोहळ्यात आणि माया अँजेलू या कवयित्रीनं बिल क्लिंटन यांच्या शपथविधीच्यावेळी कविता सादर केल्या होत्या. कालच्या सोहळ्यात लेडी गागा आणि जेनिफर लोपेझ यांच्या बरोबरीनं आमंडानं सादर केलेली कविता अनेकांचं मन जिंकून गेली.
‘या न संपणाऱ्या काळोख्या रात्री कधी संपणार आहेत का, असं आम्ही स्वत:ला विचारत होतो’ अशा विचारांनी सुरुवात झालेल्या या कवितेत ‘आम्ही शोकमग्न असलो तरी आमचा विकास करून घेतला, आम्ही थकलो तरी प्रयत्न सोडले नाहीत’ असे सकारात्मक विचार ठिकठिकाणी दिसतात.
खास त्या सोहळ्यासाठी असलेली ही कविता ‘आम्ही सामर्थ्य आणि करुणा एकत्र केली, योग्य त्या दिशेनं वाटचाल केली, तर प्रेमाचा वारसा पुढे जाईल आणि प्रेम हा आमच्या मुलांचा जन्मसिद्ध हक्क बनेल,’ असा वैश्विक विचार मांडते हे सर्वांत महत्त्वाचं!
आमंडाचा The One for Whom Food Is Not Enough हा कवितासंग्रह वाचायलाच हवा..
७२३ शब्दांची The Hill We Climb ही कविता वाचायची आणि ऐकायची असेल तर लिंक्स सोबत आहेत.
- नीलांबरी जोशी
